.ചെക്കോവ് ഇങ്ങനെയാണ് ജീവിച്ചത്. 

ടഗൻറോഗ്  പട്ടണത്തിന്റെ  ദരിദ്രമായ പശ്ചാത്തലത്തിലുള്ള  വീടുകളെപ്പോലെ ചെക്കോവ് ഭവനവും  തകരം കൊണ്ടുണ്ടാക്കിയ  മേൽപ്പുരയുള്ള ഒറ്റനിലയുള്ള വീടായിരുന്നു .വീടിനോട് ചേർന്ന് അപ്പൻ പാവേൽ ഒരു പീടിക നടത്തി . അതായിരുന്നു ആ കുടുംബത്തിന്റെ വരുമാനമാർഗം. ആട്ടിൻ  

കൊഴുപ്പുകൊണ്ടുള്ള മെഴുകുതിരിയും മണ്ണെണ്ണചിമ്മിനിയുംപലചരക്കും ചെരിപ്പും വോഡ്കയും വിറ്റിരുന്ന കടയിൽ നിന്ന് പാൽക്കട്ടിയുടെയും ഉണക്കമീനിൻെയും മണം സദാ പ്രസരിച്ചു . തൊട്ടപ്പുറത്തെ മുറിയിലായിരുന്നു വോഡ്ക സൂക്ഷിച്ചിരുന്നത് .അതിന്റെ പരുഷഗന്ധം മറ്റു സാമാനങ്ങളുടെ ഗന്ധത്തിൽ നിന്ന് വേറിട്ട് സഞ്ചരിച്ചു.

.

കക്കൂസും കുളിമുറിയും  ഉപയോഗിച്ച് അവിടത്തുകാർക്ക്  ശീലമില്ലായിരുന്നു . പിന്നാമ്പുറത്തെ വയൽ ആയിരുന്നു വെളിക്കിറങ്ങുന്ന ഇടം. കുറെ ആളുകൾക്ക് ഒരുമിച്ചു കുളിക്കാനുള്ള  കുളിപ്പുരയാണ് കഴുകാനും കുളിക്കാനുമുള്ള സ്ഥലം .ഒറ്റനില വീട്ടിലെ  ഹാളിൽ    തട്ടികകൾ കൊണ്ട് മറചുണ്ടാക്കിയ അറകളിലായിരുന്നു അപ്പന്റെയും അമ്മയുടെയും  മക്കളുടെയും  ഉറക്കം .പത്രങ്ങൾ സൂക്ഷിച്ചിരുന്ന ഷെഡിലായിരുന്നു ചെക്കോവിന്റെ ഉറക്കം .സ്‌കൂളിൽ പോകാൻ തുടങ്ങിയപ്പോൾ ആന്റണും അനിയന്മാരും മാറി മാറി കടയിലെ കാര്യങ്ങൾ നോക്കണം എന്നൊരു ഉപാധി അപ്പൻ ആജ്ഞാപിച്ചു .തൂക്കത്തിൽ വെട്ടിപ്പ് നടത്തിയിരുന്ന വിരുതന്മാരായിരുന്നു കടയിൽ പണിക്ക് നിന്നിരുന്ന പിള്ളേർ .വർഷങ്ങൾക്കുശേഷം വലിയ എഴുത്തുകാരനായി ധനസ്ഥിതി മെച്ചപ്പെട്ടപ്പോൾ ചെക്കോവ് പണ്ട് കടയിൽ നിന്നിരുന്ന സമപ്രായക്കാരനായ ഒരുത്തന്റെ മകളെ പഠിപ്പിക്കാനുള്ള ധനസഹായം നൽകി.

വേനലിനൊപ്പം ഈച്ചകൾ പീടികയുടെ  എണ്ണമയമുള്ള  കൗണ്ടറിൽ വന്ന് ആർത്തുവിളിക്കും .എലികൾക്ക് ക്ഷാമമില്ലായിരുന്നു .അവ പീടികക്കുള്ളിൽ ഓടിക്കളിക്കും. Oഒരു ദിവസം ഒരെലി എണ്ണ ഭരണിയിൽവീണ് മുങ്ങിമരിച്ചു ..അപ്പൻ പാവേൽ ദയാപൂർവം എലിയെ എടുത്തുകളഞ്ഞു .പിന്നീട് പള്ളീലച്ചനെ വിളിച്ചുകൊണ്ടുവന്ന്എണ്ണ പവിത്രമാക്കിച്ചു .ഇക്കാര്യം ചെക്കോവ് ഒരിക്കൽ ഇവാൻ ബുനിനോട് പറഞ്ഞു.ബുനിൻ ചിരിച്ചെങ്കിലും ആന്റൺ ചിരിച്ചില്ല. 

അപ്പൻ പാവേൽ ഏകാധിപനായിരുന്നു ,മതാനുഷ്ടാനങ്ങൾ  മക്കളിൽ അടിച്ചേൽപ്പിക്കുമായിരുന്നു,  അയാൾ. സമയം കളയുന്ന മട്ടിൽ വെറുതെയിരിക്കുന്നത് ഇഷ്ടമല്ലാത്തതിനാൽ എപ്പോഴും ദൈവങ്ങളുടെ ചിത്രംവരയായിരുന്നു പവേലിന്റെ ഇഷ്ടപ്പണി .നിക്കോളോയ് എന്ന മകന് പവേലിന്റെ ചിത്രമെഴുത്ത് താല്പര്യം പാരമ്പര്യമായി കിട്ടിയിരുന്നു , മരിയഎന്ന ചെക്കോവ് സഹോദരിക്കും ചിത്രമെഴുത്തിനോട് താല്പര്യമുണ്ടായിരുന്നു ,അവൾ പിന്നീട് ചിത്രകലാധ്യാപികയായി .അപ്പൻ കുട്ടികളെ പള്ളിയിലെ ഗായകസംഘത്തിൽ പാടാൻ തെളിച്ചുകൊണ്ടുപോകുമായിരുന്നു അപ്പൻറെ മതാനുഷ്ടാനപ്രേമം കുട്ടികളെ ഭയപ്പെടുത്തി .ഈസ്റ്റർ ഈവ്   എന്ന കഥയിൽ ഈ പള്ളി അനുഭവങ്ങളെ മുൻനിർത്തിയുള്ള പ്രമേയമാണ്  ചെക്കോവ് ഉപയോഗിച്ചിരിക്കുന്നത്